ആരാധകര്‍ വളരെ പ്രതീക്ഷയോടെ കാത്തിരിക്കുന്ന മമ്മൂട്ടി ചിത്രമാണ് കാതല്‍. ജിയോ ബേബിയുടെ സംവിധാനത്തില്‍ ഒരുങ്ങുന്ന സിനിമയില്‍ നായികയായെത്തുന്നത് ജ്യോതികയാണ് . ഇപ്പോള്‍ ചിത്രത്തിലെ തന്റെ ഭാഗം പൂര്‍ത്തിയാക്കിയ സന്തോഷത്തില്‍ സെറ്റില്‍ ബിരിയാണി വിളമ്പിയിരിക്കുകയാണ് മമ്മൂട്ടി.
സഹപ്രവര്‍ത്തകര്‍ക്ക് ഭക്ഷണം വിളമ്പി കൊടുക്കുന്ന ചിത്രങ്ങള്‍ മമ്മൂട്ടി തന്നെയാണ് സോഷ്യല്‍മീഡിയയില്‍ പങ്കുവച്ചിരിക്കുന്നത്. ജ്യോതികയെയും ജിയോ ബേബിയെയും ചിത്രങ്ങളില്‍ കാണാം. നേരത്തെ കാതല്‍ ലൊക്കേഷനിലെത്തിയ നടന്‍ സൂര്യക്ക് മമ്മൂട്ടി ബിരിയാണി വച്ചുനല്‍കിയിരുന്നു. കൊച്ചിയിലെ ലൊക്കേഷനിലെത്തിയ സൂര്യക്കൊപ്പം താരം ബിരിയാണി കഴിക്കുകയും ചെയ്തു.
നീണ്ട 12 വര്‍ഷങ്ങള്‍ക്കു ശേഷം ജ്യോതിക മലയാളത്തില്‍ അഭിനയിക്കുന്ന ചിത്രമാണ് കാതല്‍. ലാലു അലക്‌സ്, മുത്തുമണി, ചിന്നു ചാന്ദിനി, സുധി കോഴിക്കോട്, അനഘ അക്കു, ജോസി സിജോ, ആദര്‍ശ് സുകുമാരന്‍ എന്നിവരാണ് ചിത്രത്തിലെ മറ്റു താരങ്ങള്‍.
ആദര്‍ശ് സുകുമാരനും പോള്‍സണ്‍ സ്‌കറിയയും ചേര്‍ന്നാണ് കാതലിന്റെ തിരക്കഥ ഒരുക്കുന്നത്. സിനിമയുടെ സഹസംവിധായകന്‍ അഖില്‍ ആനന്ദനും ചീഫ് അസോസിയേറ്റ് ഡയറക്ടര്‍ മാര്‍ട്ടിന്‍ എന്‍ ജോസഫും കുഞ്ഞില മസ്സില്ലാമണിയുമാണ്.
Read more
റോഷാക്ക്’ സിനിമയ്ക്ക് ശേഷം മമ്മൂട്ടി കമ്പനിയുടെ ബാനറില്‍ മമ്മൂട്ടി നിര്‍മ്മിക്കുന്ന മൂന്നാമത്തെ ചിത്രമാണിത്. ലിജോ ജോസ് പെല്ലിശ്ശേരിയുടെ ‘നന്‍പകല്‍ നേരത്ത് മയക്കം’ ആയിരുന്നു ആദ്യ ചിത്രം. ദുല്‍ഖര്‍ സല്‍മാന്റെ വേഫെറെര്‍ ഫിലിംസ് ആണ് ചിത്രത്തിന്റെ വിതരണം നിര്‍വഹിക്കുന്നത്.
