തെലുങ്ക് സിനിമയുടെ വളരെ പ്രധാനപ്പെട്ട കേന്ദ്രങ്ങളിലൊന്നാണ് ഹൈദരാബാദിലെ ആര്‍ടിസി എക്‌സ് റോഡ്‌സ്. ഇവിടുത്തെ കളക്ഷന്‍ റിപ്പോര്‍ട്ടിനെ വളരെ ഗൗരവമായാണ് സിനിമാരംഗത്തുള്ളവരും ആരാധകരും ഒരു പോലെ കണക്കാക്കുന്നത്.

പ്രിയതാരങ്ങള്‍ക്കായി ആരാധകര്‍ കളക്ഷന്‍ തുക പൂര്‍ത്തിയാക്കാനായി പണപ്പിരിവ് നടത്താറുമുണ്ട്. ഇപ്പോഴിതാ നന്ദമൂരി ബാലകൃഷ്ണയുടെ പുതിയ ചിത്രമായ വീരസിംഹ റെഡ്ഡിയ്ക്കുവേണ്ടി ആരാധകര്‍ ഒന്നിച്ചുവെന്ന വാര്‍ത്തയാണ് പുറത്തുവരുന്നത്.

92 ലക്ഷം കളക്ഷനിലേക്ക് എത്തിയ ചിത്രത്തെ ഒരു കോടിയിലേക്കെത്തിക്കാനായി പണമെറിയുകയാണ് ആരാധകര്‍. ഇതിനായി ആരാധകരുടെ നേതൃത്ത്വത്തില്‍ പരിശ്രമം ആരംഭിച്ചിരിക്കുകയാണ്.

വലിയ ഹൈപ്പോടെയാണ് ബാലകൃഷ്ണയുടെ വീരസിംഹ റെഡ്ഡി തീയേറ്ററുകളിലെത്തിയത്. ആദ്യം കളക്ഷന്‍ നല്ലനിലയില്‍ മുന്നോട്ട് പോയെങ്കിലും ഫെസ്റ്റിവല്‍ ദിവസങ്ങള്‍ കഴിഞ്ഞതോടെ വലിയ ഇടിവാണ് സംഭവിച്ചത്.

‘അഖണ്ഡ’ എന്ന സിനിമയുടെ വന്‍ വിജയത്തിന് ശേഷം തിയേറ്ററുകളിലെത്തിയ ബാലകൃഷ്ണ ചിത്രമാണ് വീരസിംഹ റെഡ്ഡി. ഹണി റോസ്, ശ്രുതി ഹാസന്‍ എന്നിവരാണ് ചിത്രത്തില്‍ നായികമാരായത്. ലാല്‍, വരലക്ഷ്മി ശരത്കുമാര്‍, ദുനിയ വിജയ്, പി രവി ശങ്കര്‍, ചന്ദ്രികാ രവി, അജയ് ഘഓഷ്, മുരളി ശര്‍മ്മ എന്നിവരും ചിത്രത്തില്‍ വേഷമിട്ടിരുന്നു.