കേരള സർക്കാർ പട്ടികജാതി പട്ടികവർഗ്ഗ വിദ്യാർത്ഥികൾക്ക് 2022-23, 2023-24 അധ്യായന വർഷം നൽകാനുള്ള ഇ-ഗ്രാന്റ് ഫെല്ലോഷിപ്പ് കുടിശ്ശിക 138.69 കോടി രൂപയെന്ന് നിയമസഭാരേഖകൾ. എംഎൽഎ ഐസി ബാലകൃഷ്‌ണന്റെ ചോദ്യത്തിന് വകുപ്പ് മന്ത്രി കെ രാധാകൃഷ്‌ണൻ 2024 ജനുവരി 31ന് നിയമസഭയിൽ നൽകിയ മറുപടിയിലാണ് ഇത്ര ഭീമമായ തുക സർക്കാർ കുടിശ്ശിക വരുത്തിയതായി പറഞ്ഞിട്ടുള്ളത്. പട്ടികജാതി വിദ്യാർത്ഥികൾക്ക് 122.16 കോടി രൂപയും പട്ടികവർഗ്ഗ വിദ്യാർത്ഥികൾക്ക് 16.53 കോടി രൂപയുമാണ് നൽകുവാനുള്ളത്.
സംസ്ഥാനത്തെ വിവിധ യൂണിവേഴ്‌സിറ്റികളിൽ പഠിക്കുന്ന എസ്‌സി/എസ്ടി ഗവേഷകർ ഫെല്ലോഷിപ്പ് മുടങ്ങിയതിനെ തുടർന്ന് ഗവേഷണം ഉപേക്ഷിക്കേണ്ട സാഹചര്യം മുൻപ് വാർത്തയായിരുന്നു. പല ഗവേഷകരും ഗവേഷണം മുന്നോട്ട് കൊണ്ടുപോകാൻ കൂലിപ്പണിയ്ക്ക് പോകേണ്ട സാഹചര്യമാണ് നിലനിൽക്കുന്നത്. ഫെല്ലോഷിപ്പ് മുടങ്ങി ഗവേഷണം പരിപൂർണ്ണമായും മുടങ്ങുമെന്ന ഘട്ടത്തിൽ വിവിധ യൂണിവേഴ്‌സിറ്റികളിൽ പഠിക്കുന്ന ഗവേഷകർ സംഘടിച്ചു സെക്രട്ടറിയേറ്റിന് മുൻപിൽ സമരം ചെയ്തിരുന്നു. തുടർന്നാണ് ഗവേഷകർക്ക് ഭാഗികമായെങ്കിലും ഫെല്ലോഷിപ്പ് ലഭിച്ചു തുടങ്ങിയത്.
സംസ്ഥാനത്തെ വിവിധ സർവകലാശാലകളിൽ പട്ടികജാതി പട്ടികവർഗ്ഗ വികസന വകുപ്പിന്റെ സഹായത്താൽ പഠനം നടത്തുന്ന 217 ഗവേഷകർ മാത്രമാണുള്ളത്. ഇവർക്ക് ജെആർഎഫ് ഇനത്തിൽ 23250 രൂപയും എസ്ആർഎഫ് ഇനത്തിൽ 26250 രൂപയുമാണ് മാസം നൽകുന്നത്. ഇവർക്ക് ഫെല്ലോഷിപ്പ് വിതരണത്തിന് പ്രതിമാസം 50 ലക്ഷത്തിനു താഴെ മതിയാകും. എന്നിട്ടും ഈ തുക സർക്കാർ കുടിശ്ശിക വരുത്തുകയാണ്.
Read more
പട്ടികജാതി പട്ടികവർഗ്ഗ വിദ്യാർത്ഥികൾക്ക് ലപ്‌സംഗ്രാന്റ്, ഹോസ്റ്റൽ ഫീസ്, ഫീസ്, ഫെല്ലോഷിപ്പ്, അഡീഷണൽ സ്റ്റേറ്റ് അലവൻസ്, സ്റ്റേറ്റ് അക്കാദമിക് അലവൻസ് എന്നിവ നൽകാനുള്ള തുകയാണ് ഇപ്പോൾ കുടിശ്ശികയായി വന്നിട്ടുള്ള 138.69 കോടി രൂപ. ആദിവാസി-ദലിത് വിദ്യാർത്ഥികളും സംഘടനകളും നിരന്തരം സമരം ചെയ്തിട്ടും അധ്യായന വർഷം കഴിയാറായിട്ടും സർക്കാർ ഇതുവരെയും അധ്യായന വർഷം തുടങ്ങുമ്പോൾ നൽകേണ്ടുന്ന ഈ-ഗ്രാന്റ് തുകകൾ നൽകിയിട്ടില്ല.
