ജനം ടി.വി, ബി.ജെ.പി ചാനലല്ലെന്ന് പാർട്ടിയുടെ സംസ്ഥാന അദ്ധ്യക്ഷൻ കെ. സുരേന്ദ്രൻ പറഞ്ഞത് സാമൂഹിക മാധ്യമങ്ങളിൽ വലിയ ചർച്ചയായിരിക്കുകയാണ്. സ്വർണ കള്ളക്കടത്ത് കേസിൽ ജനം ടി.വി എക്സിക്യൂട്ടീവ് എഡിറ്റർ അനിൽ നമ്പ്യാരെ കസ്റ്റംസ് ചോദ്യം ചെയ്തതിനെ കുറിച്ചുള്ള മാധ്യമ പ്രവർത്തകരുടെ ചോദ്യത്തിനാണ് സുരേന്ദ്രൻ ഈ മറുപടി നൽകിയത് എന്നാൽ അഞ്ച് വർഷം മുമ്പ് ജനം ടി.വിയുടെ ഉദ്ഘാടനത്തോട് അനുബന്ധിച്ച് കെ. സുരേന്ദ്രൻ ഫെയ്സ്ബുക്കിൽ കുറിച്ച വാക്കുകൾ ഇപ്പോൾ സാമൂഹിക മാധ്യമങ്ങളിൽ പ്രചരിക്കുന്നുണ്ട്.
ജനം ടി.വിക്ക് അഭിനന്ദനങ്ങൾ അറിയിച്ച കെ. സുരേന്ദ്രൻ ബി.ജെ.പിയും സംഘപരിവാറും നേരിടുന്ന ഏറ്റവും വലിയ വെല്ലുവിളി തികച്ചും പക്ഷപാതപരമായ മാധ്യമങ്ങളാണ് എന്നും ഏറെക്കാലമായി കാത്തിരുന്ന ജനം ടി.വിയുടെ സമാരംഭം പ്രതീക്ഷയുടെ കിരണം നൽകുന്നു എന്നുമാണ് അന്ന് ഇംഗ്ളീഷിൽ കുറിച്ചത്.
ഫെയ്സ്ബുക്ക് കുറിപ്പ്:
ജനം ടി.വിക്ക് എന്റെ ഹൃദ്യമായ അഭിനന്ദനങ്ങളും ഊഷ്മളമായ സ്വാഗതവും അറിയിക്കാൻ ഞാൻ ആഗ്രഹിക്കുന്നു. ഈ ദിവസങ്ങളിൽ ബിജെപിയും സംഘപരിവറും നേരിടുന്ന ഏറ്റവും വലിയ വെല്ലുവിളി തികച്ചും പക്ഷപാതപരമായ മാധ്യമങ്ങളാണ്. ഏറെക്കാലമായി കാത്തിരുന്ന ജനം ടിവിയുടെ സമാരംഭം ഒടുവിൽ ഇതാ എത്തിയിരിക്കുന്നു, ഇത് തീർച്ചയായും നമുക്ക് പ്രതീക്ഷയുടെ ഒരു കിരണം നൽകുന്നു.
വിശ്വസ്തതയോടെ നിങ്ങളുടെ,
കെ. സുരേന്ദ്രൻ
ബി.ജെ.പിക്ക് അങ്ങനെ ഒരു ചാനലില്ല. ഈ നാട്ടില്‍ ഉള്ള കുറേ പേർ നടത്തുന്ന ചാനൽ ആണിത്. ബി.ജെപിക്കാരായിട്ടുള്ള ആരും അതിലില്ലെന്നും ഇന്ന് സുരേന്ദ്രൻ വാർത്താസമ്മേളനത്തിൽ പറഞ്ഞു.
കൈരളി ചാനലിൽ ജോലി ചെയ്യുന്നവരെല്ലാം സി.പി.ഐ.എം- കാരാണോ എന്നും സുരേന്ദ്രൻ ചോദിച്ചു. അനിൽ നമ്പ്യാരെ ചോദ്യം ചെയ്യാൻ വിളിപ്പിച്ചതിനെ കുറിച്ച് ചോദിച്ചപ്പോൾ ഇങ്ങനെ ഒരു സംഭവം നടന്നത് അറിഞ്ഞിട്ടില്ലെന്നും ഇതിനെ ബിജെപിയുമായി കൂട്ടികുഴയ്ക്കരുതെന്നുമാണ് സുരേന്ദ്രൻ മറുപടി നൽകിയത്.
Read more
https://www.facebook.com/KSurendranOfficial/photos/a.587185508032756/813442268740411/
