കേരളത്തെ മിനി പാകിസ്ഥാനെന്ന് വിളിച്ച നിതേഷ് റാണ മന്ത്രിസ്ഥാനത്ത് തുടരാൻ അർഹനല്ലെന്ന് മുഖ്യമന്ത്രി പിണറായി വിജയൻ. സംഘ്പരിവാറിന് കേരളത്തോടുള്ള അടിസ്ഥാന സമീപനമാണ് മഹാരാഷ്ട്ര മന്ത്രിയുടെ വാക്കുകളിൽ വെളിവാക്കപ്പെടുന്നതെന്നും മുഖ്യമന്ത്രി കുറ്റപ്പെടുത്തി. കഴിഞ്ഞ ദിവസമാണ് കേരളത്തിനെതിരെ വിവാദ പരാമർശവുമായി നിതേഷ് റാണ രംഗത്തെത്തിയത്.
കേരളത്തെ മിനി പാകിസ്താനെന്ന് വിളിച്ച മഹാരാഷ്ട്രയിലെ ബിജെപി മന്ത്രി നിതേഷ് റാണയുടെ പ്രസ്താവന അത്യന്തം പ്രകോപനപരവും അപലപനീയവുമാണെന്ന് മുഖ്യമന്ത്രി പറഞ്ഞു. തങ്ങൾക്ക് സ്വാധീനമുറപ്പിക്കാൻ പ്രയാസമുള്ള ഭൂപ്രദേശത്തെ അപരവത്കരിച്ചും വിദ്വേഷ പ്രചാരണങ്ങൾ നടത്തിയും ഒറ്റപ്പെടുത്തിക്കളയാമെന്നാണ് സംഘ്പരിവാർ കരുതുന്നത്. അതിനെ പിൻപറ്റിയാണ് ഇത്തരം പ്രസ്താവനകൾ വരുന്നതെന്നും മുഖ്യമന്ത്രി പറഞ്ഞു.
കേരളം മിനി പാകിസ്ഥാൻ ആണെന്നാണ് മന്ത്രി നിതീഷ് റാണെയുടെ പരാമർശം. കേരളത്തിലെ എല്ലാ ഭീകരവാദികളും രാഹുലിനും പ്രിയങ്കയ്ക്കും വോട്ട് ചെയ്തുവെന്നും നിതീഷ് റാണെ വിമർശിച്ചു. പുണെയിൽ നടന്ന പൊതുയോഗത്തിലായിരുന്നു നിതീഷ് റാണെയുടെ പരാമർശം. കേരളത്തെ മിനി പാകിസ്താനെന്ന് വിളിച്ച നിതീഷ് റാണെ പ്രിയങ്ക ഗാന്ധിക്ക് വോട്ട് ചെയ്തത് കേരളത്തിലെ തീവ്രവാദികൾ മാത്രമാണെന്നും കുറ്റപ്പെടുത്തി. കോൺഗ്രസ് നേതാക്കളായ രാഹുൽ ഗാന്ധിയും സഹോദരി പ്രിയങ്കാ ഗാന്ധിയും ലോക്സഭ തിരഞ്ഞെടുപ്പിൽ വിജയിച്ചത് അതിനാലാണെന്നും നിതീഷ് റാണെ പറഞ്ഞു.
ബിജെപി മന്ത്രി നിതീഷ് റാണെ വിവാദ പരാമർശം നടത്തുന്നത് ഇത് ആദ്യമല്ല. മുൻപും നിരവധി തവണ നിതീഷ് റാണെ വിവാദ പരാമർശങ്ങൾ നടത്തിയിരുന്നു. പുണെയിൽ നടന്ന പൊതുയോഗത്തിലും പ്രകോപന പ്രസ്താവന നടത്തുന്നില്ലെന്ന് ഉറപ്പാക്കണമെന്ന് മഹാരാഷ്ട്ര പൊലീസ് പരിപാടിയുടെ സംഘാടകരോട് ആവശ്യപ്പെട്ടിരുന്നു. എന്നാൽ ഇതൊന്നും വകവെക്കാതെയായിരുന്നു നിതേഷ് റാണെയുടെ വിവാദ പരാമർശം.
അതേസമയം കേരളത്തെ മിനി പാകിസ്ഥാൻ എന്ന് വിളിക്കുകയും രാഹുൽ ഗാന്ധിയെയും പ്രിയങ്ക ഗാന്ധിയെയും അപമാനിക്കുകയും ചെയ്ത റാണെ മന്ത്രി സ്ഥാനം രാജിവയ്ക്കണമെന്ന് നിയമസഭ പ്രതിപക്ഷ നേതാവ് വി ഡി സതീശൻ പറഞ്ഞു. വർഗീയ ശക്തികളുടെ പിന്തുണയോടെയാണ് രണ്ട് തവണ വയനാട്ടിൽ രാഹുൽ വിജയിച്ചതെന്നും പ്രിയങ്കാ ഗാന്ധിയുടെ പ്രചാരണ റാലികളിൽ തീവ്രവാദികളുണ്ടായിരുന്നുവെന്നും മുതിർന്ന സിപിഐഎം നേതാവ് എ വിജയരാഘവൻ്റെ സമാനമായ പ്രസ്താവന ചൂണ്ടിക്കാട്ടിയാണ് റാണെ വർഗീയ പരാമർശം നടത്തിയതെന്ന് സതീശൻ ചൂണ്ടികാണിച്ചു. സംഘപരിവാർ നേതൃത്വത്തെ പ്രീതിപ്പെടുത്താൻ കേരളത്തിൽ ആദ്യം സി.പി.ഐ.എം ഉണ്ടാക്കിയതാണ് ഇപ്പോൾ ദേശീയ തലത്തിൽ ബി.ജെ.പി സ്വീകരിക്കുന്നത്. സതീശൻ കൂട്ടിച്ചേർത്തു.
“വയനാട്ടിലെ പ്രിയങ്കാ ഗാന്ധിയുടെ വിജയത്തെ കുറിച്ച് സിപിഐഎം നേതാവ് എ വിജയരാഘവൻ നടത്തിയ പ്രസ്താവന കോൺഗ്രസിനെ ആക്രമിക്കാൻ ബിജെപിക്ക് വെടിമരുന്ന് നൽകുന്നതായിരുന്നു. വിജയരാഘവനെ തിരുത്തുന്നതിന് പകരം സിപിഐഎം സംസ്ഥാന സെക്രട്ടറിയടക്കമുള്ളവർ പ്രോത്സാഹിപ്പിച്ചു. ഇതിൻ്റെ പിന്നിലെ കാരണം ഇപ്പോൾ കേരളത്തിലെ ജനങ്ങൾക്ക് വ്യക്തമായി കാണാൻ കഴിയും.” അദ്ദേഹം പറഞ്ഞു.
