കേരളത്തിലെ ക്വാറികളില്‍ നല്ലൊരു ശതമാനവും അനധികൃതമാണെന്ന് പരിസ്ഥിതി പ്രവര്‍ത്തകന്‍ ഡോ. മാധവ് ഗാഡ്ഗില്‍. സംസ്ഥാന സര്‍ക്കാരിനെതിരെ രൂക്ഷ വിമര്‍ശനമുയര്‍ത്തിയാണ് അദേഹം ഇക്കാര്യം പറഞ്ഞത്. കേരളത്തില്‍ എത്ര ക്വാറികള്‍ പ്രവര്‍ത്തിക്കുന്നു എന്നതിന് കൃത്യമായ കണക്കുകളും ഇല്ല. വലിയ റിസോര്‍ട്ടുകള്‍ പ്രകൃതിക്ക് ആഘാതം സൃഷ്ടിക്കുന്നുവെന്നും അദ്ദേഹം വ്യക്തമാക്കി.
പ്രകൃതി സംരക്ഷണ സമിതി കല്‍പറ്റയില്‍ നടത്തുന്ന പരിസ്ഥിതി സംരക്ഷണ സമ്മേളനത്തില്‍ വീഡിയോ സന്ദേശത്തിലൂടെയാണ് മാധവ് ഗാഡ്ഗില്‍ ഇക്കാര്യങ്ങള്‍ വ്യക്തമാക്കിയത്.കേരളത്തിലെ ക്വാറികളുടെ നടത്തിപ്പ് കുടുംബശ്രീ സംഘങ്ങളെ എല്‍പ്പിക്കണമെന്നും തേയില തോട്ടങ്ങള്‍ ലേബര്‍ കോ ഓപ്പറേറ്റിവ് സൊസൈറ്റികള്‍ ഏറ്റെടുക്കണമെന്നും മാധവ് ഗാഡ്ഗില്‍ പറഞ്ഞു.
റിസോട്ടുകളുടെ പ്രവര്‍ത്തനവും പ്രകൃതിക്ക് ദോഷമെന്ന് പറഞ്ഞ ഗാഡ്ഗില്‍, ഗോവ മോഡലിലുള്ള ഹോം സ്റ്റേ ടൂറിസം വയനാട്ടിലും നടപ്പാക്കണമെന്ന് നിര്‍ദേശിച്ചു. വയനാട് ദുരന്തത്തിന്റെ പശ്ചാത്തലത്തില്‍, കേരളത്തില്‍ അടിക്കടി ഉണ്ടാകുന്ന ഉരുള്‍പൊട്ടലുകള്‍ക്ക് കാരണം പ്രകൃതിചൂഷണമെന്ന് മാധവ് ഗാഡ്ഗില്‍ വിമര്‍ശിച്ചിരുന്നു.
അനിയന്ത്രിതമായ നഗരവല്‍ക്കരണം, ടൂറിസം പ്രവര്‍ത്തനം, വീടുകള്‍, ഹോംസ്റ്റേകള്‍, സെന്‍സിറ്റീവ് സോണിലെ റോഡുകളുടെ നിര്‍മ്മാണം, ഉരുള്‍പൊട്ടല്‍ സാധ്യതയുള്ള മലനിരകളിലെ മരങ്ങള്‍ മുറിക്കല്‍, അറബിക്കടലിന്റെ താപനില വര്‍ധിക്കുന്നതുമൂലമുള്ള മേഘവിസ്‌ഫോടനം, അനധികൃത ഖനനം തുടങ്ങിയവയെല്ലാം ഇതിനു പിന്നിലെ കാരണങ്ങളാണെന്ന് ഗാഡ്ഗില്‍ നേരത്തെ പറഞ്ഞിരുന്നു.
Read more
അതേസമയം വയനാട്ടിലെ ഉരുള്‍പൊട്ടല്‍ ദുരന്ത ബാധിതരുടെ പുനരധിവാസം കൃത്യമായി നടപ്പാക്കേണ്ടതുണ്ടെന്ന് മാധവ് ഗാഡ്ഗില്‍ പറഞ്ഞു. മഹാരാഷ്ട്രയില്‍ അടക്കം മുമ്പ് ഉണ്ടായ ഇത്തരം പ്രകൃതി ദുരന്തങ്ങളില്‍ പുനരധിവാസം കൃത്യമായി ഉണ്ടായിട്ടില്ലെന്നും അദ്ദേഹം പറഞ്ഞു.
