വിയറ്റ്നാമിൽ കമ്പനിയുടെ ആഘോഷപരിപാടിക്കിടെ സഹപ്രവർത്തകൻ ചുംബിക്കാൻ ആവശ്യപ്പെട്ടതിനെ തുടർന്ന് ജോലി രാജിവച്ച് വിയറ്റ്നാം യുവതി. കമ്പനിയിലെ ഹ്യൂൻ ആൻ എന്ന യുവതിയാണ് രാജിവെച്ചത്. . എല്ലാമാസവും കൃത്യമായ ഇടവേളകളിൽ കമ്പനിയിലെ മുഴുവൻ ജീവനക്കാരെയും പങ്കെടുപ്പിച്ചുകൊണ്ട് നടത്തുന്ന ആഘോഷ പരിപാടിയിലാണ് യുവതിക്ക് ദുരനുഭവം ഉണ്ടായത്.
സൗത്ത് ചൈന മോർണിംഗ് പോസ്റ്റാണ് ഈ വാർത്ത പുറത്ത് കൊണ്ടുവന്നത്. വിയറ്റ്നാം സ്വദേശിനിയായ ഹ്യൂൻ ആൻ എന്ന യുവതി ഹനോയിലെ ഒരു കമ്പനിയിലായിരുന്നു ജോലി ചെയ്തു വന്നിരുന്നത്. എല്ലാമാസവും കമ്പനിയിലെ മുഴുവൻ ജീവനക്കാരെയും പങ്കെടുപ്പിച്ചുകൊണ്ട് ആഘോഷ പരിപാടി നടത്താറുണ്ട്. ഈ ആഘോഷ പരിപാടിയിൽ പങ്കെടുക്കാത്തവർക്ക് പിഴയോ അധികജോലിയോ നൽകുന്നതായിരുന്നു കമ്പനിയുടെ രീതി. ഇത് ഭയന്ന് ജീവനക്കാർ മുഴുവൻ ഈ പരിപാടിയിൽ പങ്കെടുക്കുമായിരുന്നു.
ആഘോഷ പരിപാടിയിൽ മത്സരങ്ങളും നടക്കാറുണ്ട്. മൂന്നു ഗ്ലാസ് മദ്യം ഒറ്റയടിക്ക് കുടിക്കുക എന്നതായിരുന്നു യുവതിക്ക് നൽകിയ ഗെയിം. ഗെയിം തോറ്റാൽ മേലുദ്യോഗസ്ഥനെ ചുംബിക്കണമെന്നായിരുന്നു നിബന്ധന. ചുംബന ഭീഷണിയെ ഭയന്ന് താൻ പൊട്ടിക്കരഞ്ഞുകൊണ്ട് മൂന്നു ഗ്ലാസ് മദ്യം കുടിച്ചുവെന്നും അതിനുശേഷം അയാൾ മറ്റൊരു പെൺകുട്ടിയുടെ അടുത്തേക്ക് അതേ ആവശ്യവുമായി ചെന്നുവെന്നും യുവതി പറഞ്ഞു. ചുംബിക്കാൻ തയ്യാറാവാതിരുന്ന യുവതി ജോലി രാജി വയ്ക്കുകയായിരുന്നു.
അതേസമയം സംഭവത്തിനുശേഷം തനിക്ക് ദിവസങ്ങളോളം ഭയവും ഉത്കണ്ഠയും ആയിരുന്നുവെന്നും യുവതി പറഞ്ഞു. തന്റെ സഹപ്രവർത്തകരെ അഭിമുഖീകരിക്കാൻ പോലുമുള്ള ധൈര്യം ഇല്ലായിരുന്നു. എന്തിനാണ് ഇത്തരത്തിലുള്ള ആഭാസകരമായ പ്രവൃത്തികൾ ഒരു തൊഴിൽ സ്ഥാപനത്തിൽ നടത്തുന്നതെന്ന് തനിക്ക് മനസ്സിലാകുന്നില്ലെന്നും യുവതി കൂട്ടിച്ചേർത്തു. തൻറെ സൂപ്പർവൈസറെ ഈ ദുരനുഭവത്തെക്കുറിച്ച് അറിയിച്ചെങ്കിലും യാതൊരു നടപടിയും ഉണ്ടായില്ലെന്നും ഒടുവിൽ താൻ ജോലി രാജിവെക്കുകയായിരുന്നുവെന്നും യുവതി പറഞ്ഞു.
