ഏകദിന ലോകകപ്പില്‍ നസീം ഷായുടെ അഭാവം പാകിസ്താനെതിരേ ഇന്ത്യയുടെ വിജയസാധ്യത വര്‍ധിപ്പിക്കില്ലെന്നു മുന്‍ സ്പിന്നര്‍ അമിത് മിശ്ര. നസീം ഇല്ലെങ്കില്‍ പകരം അതേ കഴിവുള്ള മറ്റൊരു ഫാസ്റ്റ് ബോളറെ കൊണ്ടുവരാന്‍ പാകിസ്ഥാന് ബുദ്ധിമുട്ടില്ലെന്നും എന്നാല്‍ അനുഭവസമ്പത്തുള്ള ഒരാളെ ലഭിക്കുകയെന്നത് വെല്ലുവിളിയാവുമെന്നും മിശ്ര ചൂണ്ടിക്കാട്ടി.
ലോകകപ്പ് പോലെയൊരു വലിയ വേദിയില്‍ അനുഭവസമ്പത്തിനു തീര്‍ച്ചയായും വലിയ പ്രാധാന്യമുണ്ട്. പക്ഷെ പാകിസ്ഥാന് ടീമിനെ സംബന്ധിച്ച് ഫാസ്റ്റ് ബോളര്‍മാരുടെ അഭാവം ഒരിക്കലും ഉണ്ടായിട്ടില്ലെന്നതാണ് ഒരു പ്രധാനപ്പെട്ട കാര്യം. ഞാന്‍ ദീര്‍ഘകാലമായി കളിച്ചുകൊണ്ടിരിക്കുകയും മത്സരങ്ങള്‍ കണ്ടുകൊണ്ടിരിക്കുകയും ചെയ്യുന്നയാളാണ്. മികച്ച ഫാസ്റ്റ് ബൗളര്‍മാരില്ലാതെ പാകിസ്ഥാനെ ഞാന്‍ ഒരിക്കല്‍പ്പോലും കണ്ടിട്ടില്ല.
എല്ലാ കാലത്തും മികച്ച ഫാസ്റ്റ് ബോളര്‍മാര്‍ അവര്‍ക്ക് ഉണ്ടായിരുന്നു. ബാറ്റര്‍മാര്‍, സ്പിന്നര്‍മാര്‍ എന്നിവരുടെ കാര്യത്തില്‍ പാകിസ്ഥാന് പലപ്പോഴും പതറിയിട്ടുണ്ടെങ്കിലും ഫാസ്റ്റ് ബോളിംഗില്‍ ഒരിക്കല്‍പ്പോലും ക്ഷീണമുണ്ടായിട്ടില്ല. 140-145 കിമി വേഗതയില്‍ ബോള്‍ ചെയ്യാന്‍ സാധിക്കുന്നവര്‍ പാകിസ്ഥാനുണ്ട്- മിശ്ര പറഞ്ഞു.
Read more
ഏഷ്യാ കപ്പിന്റെ സൂപ്പര്‍ ഫോറില്‍ ഇന്ത്യയുമായുള്ള പോരാട്ടത്തിനിടെയാണ് നസീമിന്റെ തോളിനു പരിക്കേറ്റത്. ഇതിനാല്‍ നസീമിന് ലോകകപ്പിന്റെ ആദ്യ ഭാഗം നഷ്ടപ്പെടുമെന്നാണ് അറിയുന്നത്. നായകന്‍ ബാബര്‍ അസം തന്നെ ഇക്കാര്യം സ്ഥിരീകരിച്ചിട്ടുണ്ട്.
