ഇന്ത്യയും ഓസ്ട്രേലിയയും തമ്മിലുള്ള ബോര്‍ഡര്‍ ഗവാസ്‌കര്‍ ട്രോഫിക്കു വെള്ളിയാഴ്ച തുടക്കം കുറിക്കാനിരിക്കവെ വിജയികളെക്കുറിച്ച് വമ്പന്‍ പ്രവചനം നടത്തി ഓസീസ് മുന്‍ സ്പിന്നര്‍ ബ്രാഡ് ഹോഗ്. അഞ്ച് മത്സരങ്ങളുടെ പരമ്പര ഇന്ത്യയെ തോല്‍പ്പിച്ച് ഓസ്ട്രേലിയ സ്വന്തമാക്കുമെന്നാണ് ഹോഗിന്റെ പ്രവചനം.
ഇത്തവണത്തെ ബോര്‍ഡര്‍ ഗവാസ്‌കര്‍ ട്രോഫിയില്‍ നിങ്ങള്‍ ഓസ്ട്രേലിയക്കൊപ്പം നില്‍ക്കണമെന്നു തോന്നുന്നു. 3-2നു അവര്‍ ഇത്തവണ ജയിക്കും. കാരണം പെര്‍ത്ത്, ബ്രിസ്ബണ്‍, അഡ്ലെയ്ഡ് (പിങ്ക് ബോള്‍ ടെസ്റ്റ്) എന്നീവിടങ്ങളിലെല്ലാം ഞങ്ങള്‍ കളിക്കുന്നുണ്ട്.
ഇപ്പോള്‍ ഓസ്ട്രേലിയക്കുള്ള പേസ് നിരയും അവരുടെ അനുഭവസമ്പത്തും നാട്ടിലെ സാഹചര്യങ്ങളെക്കുറിച്ചുള്ള അറിവും ടീമിനു മുതല്‍ക്കൂട്ടായി മാറും. കൂടുതല്‍ അനുഭവസമ്പത്തുള്ള പേസ് നിരയുള്ളതിനാല്‍ തന്നെ അതു ഓസീസിനു മേല്‍ക്കൈ നല്‍കും.
പെര്‍ത്ത് ടെസ്റ്റില്‍ ആര് അശ്വിനും രവീന്ദ്ര ജഡേജയും ഇന്ത്യക്കു വേണ്ടി കളിക്കണമെന്നാണ് ഞാന്‍ കരുതുന്നത്. ആദ്യ ഇന്നിംഗ്സിലെ വളരെ മികച്ച താരമാണ് ജഡേജ. പുല്ല് നിറഞ്ഞ ഇവിടുത്തെ വിക്കറ്റില്‍ ബോള്‍ സ്‌കിഡ് ചെയ്യുമെന്നാണ് പ്രതീക്ഷിക്കുന്നത്.
എന്നാല്‍ വിക്കറ്റ് കൂടുതല്‍ പഴക്കം ചെല്ലവെ അശ്വിനു സഹായം ലഭിക്കുകയും ചെയ്യും. അതുകൊണ്ടു തന്നെ രണ്ടു പേരെയും ഈ ടെസ്റ്റില്‍ ഇന്ത്യ കളിപ്പിക്കേണ്ടതുണ്ട്. ടെസ്റ്റ് മല്‍സരത്തിലെ വ്യത്യസ്ത ദിവസങ്ങളില്‍ ടീമിന മുതല്‍ക്കൂട്ടായി മാറുന്ന രണ്ടു അപൂര്‍വ്വ സ്പിന്നര്‍മാരാണ് അശ്വിനും ജഡേജയും- ഹോഗ് കൂട്ടിച്ചേര്‍ത്തു.
