ചെന്നൈ സൂപ്പർ കിംഗ്സ് (സിഎസ്കെ) പേസ് ബൗളർ മതീഷ പതിരണ തന്റെ മുൻ ക്യാപ്റ്റൻ എംഎസ് ധോണിയെ തന്റെ “ക്രിക്കറ്റ് പിതാവായി” കണക്കാക്കുന്നുവെന്ന് പറഞ്ഞു. തന്റെ പിതാവ് തന്നെ പിന്തുണച്ചതിന് സമാനമായിട്ടുള്ള കാര്യങ്ങളാണ് തനിക്കായി ധോണി ഇന്ത്യൻ പ്രീമിയർ ലീഗിൽ ചെയ്തതെന്നും താരം ഓർമിപ്പിച്ചു.
2024 നവംബറിൽ നടന്ന മെഗാ ലേലത്തിൽ പതിരണയെ സിഎസ്കെ 13 കോടി രൂപയ്ക്ക് ആണ് വാങ്ങിയത്. ഈ സീസണിൽ ഇതുവരെ നടന്ന രണ്ട് മത്സരങ്ങളിൽ നിന്ന് നാല് വിക്കറ്റുകൾ താരം നേടിയിട്ടുണ്ട്.
“സിഎസ്കെയിൽ അദ്ദേഹം എനിക്ക് നൽകിയ പിന്തുണയും മെന്റർഷിപ്പും മാർഗനിർദേശവും കാരണം എംഎസ് ധോണി എന്റെ അച്ഛനെപ്പോലെയാണ്. എന്റെ അച്ഛൻ എനിക്ക് വേണ്ടി ചെയ്ത കാര്യങ്ങൾക്ക് സമാനമായ കാര്യങ്ങളാണ് ധോണി എനിക്ക് വേണ്ടി ചെയ്തത്, അതുകൊണ്ടാണ് ഞാൻ ധോണിയെ എന്റെ ക്രിക്കറ്റ് പിതാവായി കണക്കാക്കുന്നത്,” സിഎസ്കെയുടെ ‘ദി മേക്കിംഗ് ഓഫ് മതീഷ പതിരണ’ ഡോക്യുമെന്ററിയിൽ പതിരണ പറഞ്ഞു.
ടീമിന്റെ വീഡിയോ അനലിസ്റ്റ് ലക്ഷ്മി നാരായണൻ പതിരണയുടെ ബൗളിംഗ് വീഡിയോകളിൽ ഒന്ന് കണ്ട് അത്ഭുതപ്പെട്ടതിനെ തുടർന്നാണ് ചെന്നൈ താരത്തെ ട്രയൽസിന് വിളിച്ചത് എന്നാണ് ചെന്നൈയുടെ ഉടമ ഇതേ വിഡിയോയിൽ പറഞ്ഞിരിക്കുന്നത്. ശേഷം സിഎസ്കെ നെറ്റ്സിൽ പതിരണ പന്തെറിയുന്നത് കണ്ടപ്പോൾ ധോണിക്ക് അയാളുടെ കഴിവിൽ മതിപ്പ് തോന്നി എന്നും വിശ്വനാഥൻ കൂട്ടിച്ചേർത്തു.
“എംഎസ് പതിരണയെ മുമ്പ് കണ്ടിട്ടില്ല. നെറ്റ്സിൽ ആദ്യമായി കണ്ടപ്പോൾ, അവൻ മിടുക്കൻ ആണെന്ന് ധോണി പറഞ്ഞു ” വിശ്വനാഥൻ അതേ വീഡിയോയിൽ പറഞ്ഞു.
വീട്ടിൽ തന്റെ പിതാവിനെ ബഹുമാനിക്കുന്നതുപോലെ, പാതിരാണ ധോണിയെ ബഹുമാനിച്ചിരുന്നുവെന്ന് താരത്തിന്റെ അമ്മ വിഡിയോയിൽ പറഞ്ഞു. “എംഎസ് ധോണിയെ അഭിനന്ദിക്കാൻ വാക്കുകളില്ല. അദ്ദേഹം യഥാർത്ഥ ദൈവമാണ്. മതീഷ തന്റെ പിതാവിനെ എങ്ങനെ ബഹുമാനിക്കുന്നു, അതുപോലെ, അവൻ ധോണിയെ ബഹുമാനിക്കുന്നു,” പതിരണയുടെ അമ്മ ശൈലിക പറഞ്ഞു.
