ബോർഡർ-ഗവാസ്‌കർ ട്രോഫി 2024-25ലെ ആദ്യ ടെസ്റ്റിൻ്റെ ഒന്നാം ദിനത്തിൽ ഇന്ത്യ ഓസ്‌ട്രേലിയയെ ശരിക്കും ഞെട്ടിച്ചിരിക്കുകയാണ്. ആദ്യം ബാറ്റ് ചെയ്ത ഇന്ത്യയെ 150 റൺസിന് പുറത്താക്കിയ ഓസ്ട്രേലിയ സന്തോഷിച്ചെങ്കിലും അതിമനോഹരമായിട്ടാണ് ഇന്ത്യ തിരിച്ചെത്തിയത്. ഓസ്‌ട്രേലിയയെ ഞെട്ടിച്ച ബുംറയും സംഘവും മറുപടിയിൽ അവരെ 67 – 7 എന്ന നിലയിലേക്ക് ഒതുക്കുക ആയിരുന്നു.
ബുംറയുടെ തകർപ്പൻ 4 വിക്കറ്റ് പ്രകടനം ആണ് ഇന്ത്യയെ മത്സരത്തിലേക്ക് തിരികെയെത്തിച്ചത്. അതിമനോഹരമായ ഫീൽഡ് സെറ്റിങ്ങിലൂടെയും ബോളിങ് മാറ്റത്തിലൂടെയും ബുംറ ഞെട്ടിക്കുക ആയിരുന്നു. ഓസ്ട്രേലിയ ഒരിക്കലും പ്രതീക്ഷിക്കാത്ത രീതിയിൽ ഉള്ള മറുപടി തന്നെയാണ് ഇന്ത്യ നൽകിയതെന്ന് പറയാം.
മുൻ പാകിസ്ഥാൻ ക്യാപ്റ്റൻ വസീം അക്രം, മികച്ച ബോളിങ് നടത്തിയ ബുംറയെ പ്രശംസിച്ചു. ജതിൻ സപ്രുവിനോടും ദീപ് ദാസ്ഗുപ്തയോടും സംസാരിച്ച അദ്ദേഹം ജസ്പ്രീത് ബുംറയെ വെസ്റ്റ് ഇൻഡീസിൻ്റെ ഇതിഹാസതാരം അന്തരിച്ച മാൽക്കം മാർഷലുമായി താരതമ്യം ചെയ്തു. “ ആദ്യ പന്ത് മുതൽ താളത്തിൽ പന്തെറിയുന്ന കുറച്ച് ബൗളർമാരെ മാത്രമേ ഞാൻ കണ്ടിട്ടുള്ളൂ. അവർ ബൗൾ ചെയ്യാൻ വരുമ്പോൾ, അവർക്ക് ഇതിനകം പ്ലാനുകൾ ഉണ്ട്. ബൗളർമാരിൽ ഭൂരിഭാഗവും മൂന്ന്-നാല് പന്തുകൾ എടുത്താണ് ഒന്ന് സെറ്റ് ആകുന്നത്. അത് ബാറ്റർമാരെ സഹായിക്കും.”
“എപ്പോഴും താളത്തിലായതിനാൽ മാൽക്കം മാർഷലിനെപ്പോലെയാണ് ബുംറ. മാർഷൽ ഒരു ബൗളറായിരുന്നു, തൻ്റെ സ്പെല്ലിൻ്റെ ആദ്യ പന്ത് മുതൽ ബാറ്റർമാർക്ക് ഒന്നും അദ്ദേഹം നൽകിയില്ല. ഇപ്പോൾ ബുംറയാണ് അത് പോലെ ഉള്ള താരം ”വസീം അക്രം പറഞ്ഞു.
