ബറോഡ: കൊറോണ വൈറസ് വ്യാപനത്തിന്റെ പശ്ചാത്തലത്തില്‍ എല്ലാ താരങ്ങളും കഴിവിന് അനുസരിച്ച് സഹായം പ്രഖ്യാപിക്കുന്ന തിരിക്കിലാണല്ല ഇതിനിടെ ദുരിതമനുഭവിക്കുന്ന ജനങ്ങള്‍ക്ക് സഹായഹസ്തവുമായി വീണ്ടും പത്താന്‍ സഹോദരന്‍മാര്‍ രംഗത്തെത്തി.
രാജ്യവ്യാപകമായി ലോക്ഡൗണ്‍ ഏര്‍പ്പെടുത്തിയതോടെ ദുരിതത്തിലായ ജനങ്ങളെ സഹായിക്കുന്നതിന് ഇര്‍ഫാന്‍ പത്താനും യൂസഫ് പത്താനും ചേര്‍ന്ന് നൂറു ടണ്‍ അരിയും 700 കിലോ ഉരുളക്കിഴങ്ങും വിതരണം ചെയ്യും. ബറോഡയിലെ പാവപ്പെട്ട ജനങ്ങള്‍ക്കായാണ് ഇരുവരും അരിയും ഉരുളക്കിഴങ്ങും വിതരണം ചെയ്യുന്നത്. ഏതാനും ദിവസം മുന്‍പ് ബറോഡ പൊലീസിന്റെയും ആരോഗ്യ പ്രവര്‍ത്തകരുടെയും സഹകരണത്തോടെ ഇരുവരും നഗരത്തില്‍ 4000 മാസ്‌കുകളും വിതരണം ചെയ്തിരുന്നു.
നേരത്തെ, ബിസിസിഐ പ്രസിഡന്റ് സൗരവ് ഗാംഗുലി ബംഗാളില്‍ ദുരിതമനുഭവിക്കുന്ന ജനങ്ങള്‍ക്കായി 50 ലക്ഷം രൂപയുടെ അരി വിതരണം ചെയ്യുമെന്ന് വ്യക്തമാക്കിയിരുന്നു. ഇതിനു പുറമെ ഒട്ടേറെ കായിക താരങ്ങളാണ് പ്രധാനമന്ത്രിയുടെ കെയേഴ്‌സ് ഫണ്ടിലേക്കും വിവിധ സംസ്ഥാനങ്ങളിലെ മുഖ്യമന്ത്രിമാരുടെ ദുരിതാശ്വാസ നിധികളിലേക്കും വിവിധ തുകകള്‍ സംഭാവന ചെയ്തത്.
Read more
സച്ചിന്‍ തെന്‍ഡുല്‍ക്കര്‍, വിരാട് കോഹ്ലി, രോഹിത് ശര്‍മ, സുരേഷ് റെയ്‌ന, അജിന്‍ക്യ രഹാനെ, ഇഷാന്ത് ശര്‍മ, യുവരാജ് സിംഗ് തുടങ്ങിയവരാണ് സംഭാവന പ്രഖ്യാപിച്ച പ്രമുഖ ക്രിക്കറ്റ് താരങ്ങള്‍. മിതാലി രാജ് ഉള്‍പ്പെടെയുള്ള വനിതാ താരങ്ങളും സഹായവുമായി രംഗത്തുണ്ട്
