കരിയറില്‍ താന്‍ ബോള്‍ ചെയ്യാന്‍ ഏറ്റവും വെറുത്ത ബാറ്റര്‍ ആരെന്ന് വെളിപ്പെടുത്തി ഇംഗ്ലണ്ട് മുന്‍ ഫാസ്റ്റ് ബോളര്‍ സ്റ്റുവര്‍ട്ട് ബ്രോഡ്. ഇന്ത്യന്‍ മുന്‍ താരം യുവരാജ് സിംഗിനോട് ഒരോവറില്‍ ആറ് പന്തും സിക്‌സ് വഴങ്ങിയ ബോളറാണ് ബ്രോഡ്. എന്നാല്‍ യുവരാജ് അല്ല ബ്രോഡ് വെറുക്കുന്ന ബാറ്റര്‍. ദക്ഷിണാഫ്രിക്കന്‍ മുന്‍ നായകന്‍ ഗ്രേയം സ്മിത്താണ് താന്‍ ബൗള്‍ ചെയ്യാന്‍ ഏറ്റവുമധികം വെറുത്തിരുന്ന ബാറ്ററെന്ന് ബ്രോഡ് വെളിപ്പെടുത്തി.
ഫെബ്രുവരി ഒന്ന് സ്മിത്തിന്റെ പിറന്നാള്‍ ദിനമായിരുന്നു. ഇതുമായി ബന്ധപ്പെട്ട് അദ്ദേഹത്തിനു പിറന്നാള്‍ ആശംസകള്‍ നേര്‍ന്ന് ഇഎസ്പിഎന്‍ ക്രിക്ക്ഇന്‍ഫോ ഒരു പോസ്റ്റിട്ടിരുന്നു. ഇതിനു താഴെയായിരുന്നു ബ്രോഡിന്റെ രസകരമായ കമന്റ്. യുവിയേക്കാള്‍ കൂടുതല്‍ ബൗള്‍ ചെയ്യാന്‍ താന്‍ വെറുത്തത് അദ്ദേഹത്തിനെതിരേയാണ് എന്നായിരുന്നു പൊട്ടിച്ചിരിക്കുന്ന ഇമോജിയോടൊപ്പം സ്മിത്തിനെക്കുറിച്ച് ബ്രോഡ് കുറിച്ചത്.
ഈ കമന്റിനോടു വൈകാതെ സ്മിത്ത് പ്രതികരിക്കുകയും ചെയ്തു. നമ്മുടെ പോരാട്ടങ്ങള്‍ ഇഷ്ടപ്പെട്ടിരുന്നു ബിഗ് മാന്‍ എന്നായിരുന്നു സ്മിത്തിന്റെ മറുപടി. ഇംഗ്ലണ്ടും ദക്ഷിണാഫ്രിക്കയും തമ്മില്‍ മുഖാമുഖം വന്നപ്പോഴെല്ലാം സ്മിത്തും ബ്രോഡും തമ്മിലുള്ള ഏറ്റുമുട്ടലകള്‍ക്ക് ക്രിക്കറ്റ് ലോകം സാക്ഷ്യം വഹിച്ചിട്ടുണ്ട്.
Read more
ഇംഗ്ലണ്ടിനെതിരെ 21 ടെസ്റ്റുകളില്‍ നിന്നും സ്മിത്ത് അടിച്ചെടുത്തത് ഏഴു സെഞ്ച്വറികളാണ്. കൂടാതെ തുടര്‍ച്ചയായി രണ്ടു ഡബിള്‍ സെഞ്ച്വറികളും ഇംഗ്ലണ്ടിനെതിരേ അദ്ദേഹം നേടിയിട്ടുണ്ട്. ബ്രോഡാകട്ടെ ദക്ഷിണാഫ്രിക്കയ്‌ക്കെതിരെ 25 മത്സരങ്ങള്‍ കളിച്ച് 89 വിക്കറ്റുകള്‍ നേടിയിട്ടുണ്ട്.
