ചെന്നൈയിലെ എംഎ ചിദംബരം സ്റ്റേഡിയത്തിൽ, അഞ്ച് തവണ ചാമ്പ്യന്മാരായ മുംബൈ ഇന്ത്യൻസ് (എംഐ)ക്കെതിരായ മത്സരത്തോടെ, ക്രിക്കറ്റിലെ മഹാന്മാരിൽ ഒരാളും മുൻ ഇന്ത്യയും ചെന്നൈ സൂപ്പർ കിംഗ്‌സും (സിഎസ്‌കെ) ക്യാപ്റ്റനുമായ എംഎസ് ധോണി മത്സരരംഗത്തേക്ക് മടങ്ങി എത്തിയിരിക്കുകയാണ്. ഐപിഎൽ 2024-ൽ കളിച്ചതിന് ശേഷമുള്ള എംഎസ് ധോണിയുടെ ആദ്യ മത്സരമായിരുന്നു കഴിഞ്ഞ ദിവസം നടന്നത്.
കഴിഞ്ഞ വർഷം പരിക്കിന്റെ ബുദ്ധിമുട്ടുകൾക്ക് ഇടയിലും താരം മികവ് കാണിക്കുന്നത് നമ്മൾ കണ്ടതാണ്. ഈ സീസണിലെ ആദ്യ പോരിൽ നൂർ അഹമ്മദിന്റെ പന്തിൽ എംഎസ് ധോണി മിന്നൽ വേഗത്തിലുള്ള സ്റ്റമ്പിംഗ് നടത്തി സൂര്യകുമാർ യാദവിന്റെ ബെയ്‌ൽസ്‌ തെറിപ്പിച്ചു. 0 . 12 സെക്കൻഡിൽ ഉള്ള മിന്നൽ സ്റ്റമ്പിങ് നിമിഷം സോഷ്യൽ മീഡിയ ഏറ്റെടുത്തിരിക്കുകയാണ്.
ഹിന്ദി കമന്ററി പാനലിലെ അംഗമായ മുൻ ഇന്ത്യൻ ക്രിക്കറ്റ് താരം ഹർഭജൻ സിംഗ് ധോണിയെക്കുറിച്ച് ചില കാര്യങ്ങൾ പറഞ്ഞിരിക്കുകയാണ് “ഇന്നും എം.എസ്. ധോണിയെപ്പോലെ ഒരു വിക്കറ്റ് കീപ്പറില്ല. ഈ പ്രായത്തിൽ, അത്തരമൊരു വിക്കറ്റ് കീപ്പിംഗ്, അതൊരു മിന്നൽ വേഗത്തിലായിരുന്നു,” അദ്ദേഹം പറഞ്ഞു.
“എനിക്ക് തോന്നുന്നു ആ മത്സരത്തിൽ മുംബൈയ്ക്ക് കൂടുതൽ നന്നായി ബാറ്റ് ചെയ്യാൻ കഴിയുമായിരുന്നു. അതിനാൽ തന്നെ അവർക്ക് സങ്കടം തോന്നാം. ” അദ്ദേഹം കൂട്ടിച്ചേർത്തു.
അതേസമയം സീസണിലെ തങ്ങളുടെ രണ്ടാം മത്സരത്തിൽ ചെന്നൈ ശനിയാഴ്ച്ച ബാംഗ്ലൂരിനെ നേരിടും.
