മോഹൻലാലിനെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്ത ‘മലൈക്കോട്ടൈ വാലിബൻ’ മികച്ച പ്രേക്ഷക പ്രതികരണങ്ങളോടെ മുന്നേറുകയാണ്. ടെലിവിഷൻ സീരിയലുകളിലൂടെയും ബിഗ് ബോസ് എന്ന പരിപാടിയിലൂടെയും ശ്രദ്ധേയയായ സുചിത്ര നായരും വാലിബനിൽ ഒരു പ്രധാന വേഷം അവതരിപ്പിച്ചിട്ടുണ്ട്.
മാതംഗി എന്ന കഥാപാത്രമായാണ് സുചിത്ര ചിത്രത്തിലെത്തിയിരിക്കുന്നത്. ചിത്രത്തിലെ പ്രകടനത്തിന് മികച്ച പ്രതികരണവും സുചിത്രയ്ക്ക് കിട്ടുന്നുണ്ട്. ഇപ്പോഴിതാ വാലിബൻ ചിത്രീകരണ സമയത്തെ അനുഭവങ്ങൾ പങ്കുവെക്കുകയാണ് സുചിത്ര. ചിത്രീകരണ സമയത്ത് മോഹൻലാലിന് ചെസ്റ്റ് ഇൻഫെക്ഷൻ മറ്റും വന്നുവെന്ന് സുചിത്ര പറയുന്നു.
“ഞാന്‍ സിനിമയില്‍ ജോയിൻ ചെയ്യുന്ന സമയത്ത് കൊടുംതണുപ്പായിരുന്നു. മൈനസ് ഡിഗ്രിയിലൊക്കെയായിരുന്നു ജോലി ചെയ്യേണ്ടിയിരുന്നത്. ലാലേട്ടന് ഫൈറ്റ് സീനുകളെടുക്കുമ്പോള്‍ പൊടിയടിച്ച് ചെസ്റ്റ് ഇന്‍ഫെക്ഷനും പനിയും വന്നു. രാത്രി രണ്ടുമണിക്കൊക്കെ ചിത്രീകരണമുണ്ടായിരുന്നു.
Read more
ആ സമയത്താണെങ്കില്‍ നല്ല തണുപ്പും അതിലും തണുപ്പുള്ള കാറ്റും. പോരാത്തതിന് പൊടിക്കാറ്റും. സെറ്റിലെ എല്ലാവര്‍ക്കും വയ്യാതായി. എനിക്ക് തണുപ്പുമാത്രമേ നേരിടേണ്ടിവന്നുള്ളൂ. ബാക്കിയുള്ളവരെല്ലാം തണുപ്പും ചൂടും പൊടിയുമെല്ലാം അനുഭവിച്ചു.” എന്നാണ് മാതൃഭൂമിക്ക് നൽകിയ അഭിമുഖത്തിൽ സുചിത്ര പറഞ്ഞത്.
