ദാദാ സാഹിബ് ഫാല്‍ക്കെ ഇന്റര്‍നാഷണല്‍ ഫിലിം ഫെസ്റ്റിവല്‍ ദക്ഷിണേന്ത്യന്‍ അവാര്‍ഡുകള്‍ പ്രഖ്യാപിച്ചു. മലയാളത്തില്‍ മനു അശോകന്‍ ചിത്രം “ഉയരെ” ആണ് മികച്ച ചിത്രം. മികച്ച നടന്‍ സുരാജ് വെഞ്ഞാറമ്മൂട് നേടി. ആന്‍ഡ്രോയിഡ് കുഞ്ഞപ്പനിലെ പ്രകടനമാണ് സുരാജിനെ അവാര്‍ഡിന് അര്‍ഹനാക്കിയത്.
പാര്‍വതി തിരുവോത്ത് മികച്ച നടിയായി തിരഞ്ഞെടുക്കപ്പെട്ടു. ഉയരെയിലെ പ്രകടനത്തിനാണ് പുരസ്‌ക്കാരം. മികച്ച വെര്‍സറ്റൈല്‍ ആക്ടര്‍ പുരസ്‌ക്കാരം മോഹന്‍ലാലിന് ലഭിച്ചു. കുമ്പളങ്ങി നൈറ്റ്‌സ് ഒരുക്കിയ മധു സി. നാരായണന്‍ ആണ് മികച്ച സംവിധായകന്‍. ദീപക് ദേവ് മികച്ച സംഗീത സംവിധായകനായി തിരഞ്ഞെടുക്കപ്പെട്ടു.
അതേസമയം, തമിഴില്‍ മികച്ച നടന്‍ ധനുഷും (അസുരന്‍), നടി ജ്യോതികയുമാണ് (രാക്ഷസി). വേര്‍സറ്റൈല്‍ ആക്ടര്‍ പുരസ്‌ക്കാരം നടന്‍ അജിത്തിനാണ്. ഒത്ത സെറുപ്പു സൈസ് 7 എന്ന സിനിമയിലൂടെ പാര്‍ത്ഥിപന്‍ മികച്ച സംവിധായകനായി. ടു ലെറ്റ് ആണ് മികച്ച ചിത്രം. അനിരുദ്ധ് രവിചന്ദര്‍ മികച്ച സംഗീത സംവിധായകന്‍.
തെലുങ്കില്‍ നാഗാര്‍ജുനയ്ക്കും കന്നഡയില്‍ ശിവ രാജ്കുമാറിനുമാണ് വെര്‍സറ്റൈല്‍ ആക്ടര്‍ പുരസ്‌കാരങ്ങള്‍. ഇന്ത്യന്‍ സിനിമയുടെ പിതാവായി അറിയപ്പെടുന്ന ദാദാ സാഹിബ് ഫാല്‍ക്കെയുടെ ഓര്‍മ്മയ്ക്കായി നല്‍കുന്ന പുരസ്‌കാരമാണിത്. ഫെബ്രുവരി 20ന് മുംബൈയിലെ താജ് ലാന്‍ഡ്‌സ് എന്‍ഡ് ഹോട്ടലില്‍ വച്ച് പുരസ്‌കാര വിതരണ ചടങ്ങ് നടക്കുമെന്ന് അണിയറക്കാര്‍ അറിയിച്ചു.
തെലുങ്കില്‍ ജേഴ്‌സി ആണ് മികച്ച ചിത്രം. മികച്ച നടന്‍ നവീന്‍ പൊലിഷെട്ടി (ഏജന്റ് സായ് ശ്രീനിവാസ അത്രേയ), മികച്ച നടി രശ്മിക മന്ദാന (ഡിയര്‍ കോമ്രേഡ്), മികച്ച സംവിധായകന്‍ സുജീത്ത് (സാഹോ), മികച്ച സംഗീത സംവിധായകന്‍ എസ്. തമന്‍.
Read more
