തമിഴ് നടന്‍ ജയ് രഹസ്യ വിവാഹം ചെയ്തതായി പ്രചാരണങ്ങള്‍. നടി പ്രഗ്യ നാഗ്രയെ ജയ് വിവാഹം ചെയ്തുവെന്ന വാര്‍ത്തകളാണ് ഇപ്പോള്‍ പ്രചരിക്കുന്നത്. കഴിഞ്ഞ ദിവസം ഇരുവരും ഒന്നിച്ചുള്ള ചിത്രം സോഷ്യല്‍ മീഡിയയില്‍ വൈറലായിരുന്നു.
”ദൈവത്തിന്റെ അനുഗ്രഹത്തോടെ പുതിയ ജീവിതം ആരംഭിച്ചു” എന്ന ക്യാപ്ഷനോടെ ജയ്യും പ്രഗ്യ നാഗ്രയും പങ്കുവച്ച ഇന്‍സ്റ്റഗ്രാം സ്റ്റോറിയാണ് വാര്‍ത്തകള്‍ക്ക് ആധാരം. നെറ്റിയില്‍ സിന്ദൂരവും താലിയും അണിഞ്ഞ് ജയ്‌ക്കൊപ്പം ഇരിക്കുന്ന പ്രഗ്യയെ ആണ് ഫോട്ടോയിലുള്ളത്.
ഇരുവരുടെയും കയ്യില്‍ പാസ്‌പോര്‍ട്ടും ഫ്‌ളൈറ്റ് ടിക്കറ്റും കാണാം. ഇതോടെയാണ് ഇരുവരും രഹസ്യമായി വിവാഹം ചെയ്‌തെന്ന വാര്‍ത്തകള്‍ പരന്നത്. വാര്‍ത്തകള്‍ എത്തിയതോടെ തങ്ങള്‍ വിവാഹം ചെയ്തിട്ടില്ലെന്ന് വ്യക്തമാക്കി ജയ്യും പ്രഗ്യയും രംഗത്തെത്തി.
താന്‍ നയന്റീസ് കിഡ് ആയ സിങ്കിള്‍ ആണ് എന്നായിരുന്നു ജയ് ഇന്‍സ്റ്റഗ്രാം സ്റ്റോറിയായി കുറിച്ചത്. നടി പ്രഗ്യയും വാര്‍ത്തകളില്‍ പ്രതികരണം അറിയിച്ചിട്ടുണ്ട്. ചെന്നൈ സൂപ്പര്‍കിങ്സിന്റെ മത്സരം കാണാനെത്തിയപ്പോള്‍ എടുത്ത ചിത്രത്തിനൊപ്പമായിരുന്നു പോസ്റ്റ്. താന്‍ ഇപ്പോഴും അവിവാഹിതയാണ് എന്നാണ് പ്രഗ്യ കുറിച്ചത്.
ഷൂട്ടിങ് ലൊക്കേഷനില്‍ നിന്നുള്ളതായിരുന്നു ഈ ചിത്രങ്ങള്‍. താരങ്ങള്‍ക്ക് പിന്നിലായി ക്യാമറ സജ്ജീകരിച്ചിരിയ്ക്കുന്നത് ചിത്രത്തില്‍ വ്യക്തമായി കാണാം. ‘ബേബി ആന്‍ഡ് ബേബി’ എന്ന സിനിമയില്‍ ഒരുമിച്ച് അഭിനയിച്ചുകൊണ്ടിരിക്കുകയാണിപ്പോള്‍ ജയ്യും പ്രഗ്യയും.
