മലപ്പുറം ലോക്‌സഭാ മണ്ഡലം എൻഡിഎ സ്ഥാനാർഥി എം. അബ്ദുൾസലാം വിജയിച്ചാൽ മൂന്നാം മോദി സർക്കാരിൽ കേന്ദ്രമന്ത്രിയാകുമെന്ന് ന്യൂനപക്ഷമോർച്ച അഖിലേന്ത്യാ അധ്യക്ഷൻ ജമാൽ സിദ്ദീഖി. മലപ്പുറം പാർലമെന്റ് മണ്ഡലം എൻഡിഎ തിരഞ്ഞെടുപ്പ് കൺവെൻഷൻ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ജെ.പി നദ്ദയും നരേന്ദ്രമോദിയും അബ്‌ദുൾസലാമിൻ്റെ ഏറ്റവും അടുത്ത സുഹൃത്തുക്കളാണെന്നും ജെ.പി നദ്ദ നേരിട്ടാണ് അബ്‌ദുൾസലാമിനോട് മലപ്പുറത്തെ സ്ഥാനാർഥിയാകാൻ ആവശ്യപ്പെട്ടതെന്നും ജമാൽ സിദ്ദീഖി പറഞ്ഞു. അതേസമയം ഇന്ത്യയിലെ മുസ്ലിം വിഭാഗങ്ങളുടെ കൂടി സംരക്ഷണത്തിനാണ് കേന്ദ്രസർക്കാർ പൗരത്വനിയമ ഭേദഗതി കൊണ്ടുവന്നതെന്നും ജമാൽ സിദ്ദീഖി പറഞ്ഞു.
സിഎഎ വിഷയം ഉയർത്തിക്കാട്ടി മുസ്ലിം വിഭാഗത്തിനിടയിൽ ഭീതി സൃഷ്ടിക്കാനാണ് ഇടത്-വലത് മുന്നണികൾ ശ്രമിക്കുന്നത്. ഇരുമുന്നണികളും പ്രചരിപ്പിക്കുന്നത് സിഎഎ. നിയമം ഇന്ത്യയിലെ മുസ്ലിങ്ങളെ പാകിസ്താനിലേക്ക് അയക്കുമെന്നാണ്. മറ്റു രാജ്യങ്ങളിൽ പീഡനം അനുഭവിക്കുന്ന ന്യൂനപക്ഷങ്ങൾക്ക് നിയമം മൂലം സംരക്ഷണമുണ്ടാകുമെന്നും ജമാൽ സിദ്ദീഖി പറഞ്ഞു.
Read more
യുപിഎ സർക്കാരുകളുടെ കാലത്ത് ന്യൂനപക്ഷങ്ങൾ ഇന്ത്യയിലേക്ക് കടന്നുവന്നിട്ടുണ്ടെന്നും എന്നാൽ ഇതുവരെ അവർക്ക് പൗരത്വം നൽകാൻ നമുക്കായിട്ടില്ലെന്നും ഈ നിയമം അതിനാണെന്നും ജമാൽ സിദ്ദീഖി വ്യക്തമാക്കി. ബിജെപി സംസ്ഥാന വൈസ് പ്രസിഡൻ്റ് വി.വി രാജൻ കൺവെൻഷന് അധ്യക്ഷത വഹിച്ചു. അഡ്വ. വി.പി ശ്രീപത്മനാഭൻ മുഖ്യപ്രഭാഷണം നടത്തി. സി. വാസുദേവൻ, സന്തോഷ് കാളിയത്ത്, സുനിൽകുമാർ, രശ്മിൽ നാഥ്, കെ. രാമചന്ദ്രൻ, പ്രേമൻ, പി. ശിവദാസൻ, തുടങ്ങിയവർ പ്രസംഗിച്ചു.
