തുടര്‍ച്ചയായ പരാജയങ്ങളിലൂടെ ഈ സീസണില്‍ പോയിന്റ് പട്ടികയില്‍ താഴോട്ട് പോയ ടീമാണ് മുംബൈ ഇന്ത്യന്സ്. ടീമിനെ മാറി മാറി പരീക്ഷിച്ചെങ്കിലും ഇത്തവണ ഒരു കളി മാത്രമാണ് ഹാര്‍ദിക് പാണ്ഡ്യയുടെ ടീമിന് വിജയിക്കാന്‍ സാധിച്ചത്. എന്നാല്‍ മുംബൈ ഇന്ത്യന്സ് ക്യാംപിനും ആരാധകര്‍ക്കും സന്തോഷമുണ്ടാക്കുന്ന ഒരു വാര്‍ത്തയാണ് സോഷ്യല്‍ മീഡിയയില്‍ വന്നിരിക്കുന്നത്. അവരുടെ സ്റ്റാര്‍ പേസര്‍ ജസ്പ്രീത് ബുംറ ടീമിനൊപ്പം ചേര്‍ന്നിരിക്കുകയാണ്. ബുംറയുടെ ഭാര്യയും അവതാരകയുമായ സഞ്ജന ഗണേഷനാണ് തന്റെ സോഷ്യല്‍ മീഡിയ പേജിലൂടെ ഈ വിവരം അറിയിച്ചത്.
ബോര്‍ഡര്‍ ഗവാസ്‌കര്‍ പരിപാടിക്കിടെ പരിക്കേറ്റ് പിന്മാറിയ താരത്തിന് പിന്നാല വന്ന ചാമ്പ്യന്‍സ് ട്രോഫി മത്സരങ്ങള്‍ നഷ്ടമായിരുന്നു. തുടര്‍ന്ന് ഐപിഎലിലൂടെ ബുംറ തിരിച്ചുവരുമെന്ന റിപ്പോര്‍ട്ടുകളാണ് ആരാകര്‍ക്ക് അല്‍പമെങ്കിലും ആശ്വാസം പകര്‍ന്നത്. ഇപ്പോഴിതാ എല്ലാവരും കാത്തിരുന്ന നിമിഷം വന്നെത്തിയിരിക്കുകയാണ്. അച്ഛനെ കുറിച്ച് മകന്‍ അങ്കദ് ബുംറയ്ക്ക് കഥ പറഞ്ഞുകൊടുക്കുന്ന തരത്തിലുളള ഒരു വീഡിയോയാണ് ബുംറയുടെ തിരിച്ചുവരവില്‍ സഞ്ജന ട്വിറ്ററില്‍ ട്വീറ്റ് ചെയ്തിരിക്കുന്നത്.
“അങ്കദ് ഞാനൊരു കഥ പറഞ്ഞുതരാം, 2013ല്‍, ഈ കാട്ടിലേക്ക് ഒരു കുട്ടിയാന കടന്നുവന്നു. റണ്‍സും സിക്‌സറുകളും ബൗണ്ടറികളും നിറഞ്ഞ കാട്ടില്‍. എല്ലാവരും ഭയന്നിരുന്നിടത്ത് വര്‍ഷങ്ങളായി അവന്‍ ധൈര്യം കാണിച്ചു. അവന്‍ നിരവധി യുദ്ധങ്ങള്‍ നടത്തി. അതിജീവനത്തിനായി പോരാടി. അവന്‍ തന്റെ അഭിമാനത്തിനായി പോരാടി. അവന്‍ ജയിച്ചു.അവന്‍ തോറ്റു. പക്ഷേ ഒരിക്കലും തളര്‍ന്നില്ല. ഈ യുദ്ധങ്ങള്‍ അവനില്‍ മുറിവുകള്‍ അവശേഷിപ്പിച്ചു. പക്ഷേ ഈ മുറിവുകള്‍ അവനെ തടഞ്ഞില്ല. ഒരിക്കല്‍ ഒരു കുട്ടിയാന, ഇപ്പോള്‍ സിംഹം. സിംഹം തിരിച്ചെത്തി. അവന്‍ വീണ്ടും ഈ കാട്ടിലെ രാജാവായി”, സഞ്ജന ഗണേഷന്‍ വീഡിയോയില്‍ പറഞ്ഞു.
𝑹𝑬𝑨𝑫𝒀 𝑻𝑶 𝑹𝑶𝑨𝑹 🦁#MumbaiIndians #PlayLikeMumbai #TATAIPL pic.twitter.com/oXSPWg8MVa
— Mumbai Indians (@mipaltan) April 6, 2025
