നടി രംഭയ്ക്ക് കിട്ടാത്ത ശ്രദ്ധയാണ് ഒറ്റ നോട്ടം കൊണ്ട് നിഖില വിമല്‍ നേടിയതെന്ന് നടന്‍ ശശികുമാര്‍. നിഖില വിമലിന്റെ വളര്‍ച്ചയില്‍ സന്തോഷമുണ്ടെന്ന് പറഞ്ഞാണ് ശശികുമാര്‍ സംസാരിച്ചത്. ഇതിനിടെയാണ് ‘അഴകിയ ലൈല’ ഗാനത്തെ കുറിച്ചും ശശികുമാര്‍ പറഞ്ഞത്. ‘ഗുരുവായൂരമ്പല നടയില്‍’ സിനിമയില്‍ സൂപ്പര്‍ ഹിറ്റ് തമിഴ് ഗാനം അഴകിയ ലൈലയുടെ അകമ്പടിയോടെയാണ് നിഖിലയുടെ എന്‍ട്രി.
ഇത് സോഷ്യല്‍ മീഡിയയില്‍ അടക്കം ട്രെന്‍ഡ് ആയി മാറിയിരുന്നു. നിഖിലയെ കുറിച്ച് സംസാരിക്കവെയാണ് ശശികുമാര്‍ രംഭയ്ക്ക് ലഭിക്കാത്ത പ്രശസ്തിയാണ് അഴകിയ ലൈലയിലൂടെ നിഖിലയ്ക്ക് ലഭിച്ചത് എന്ന് പറഞ്ഞിരിക്കുന്നത്. ”അത്രയും വെയിലില്‍ നാല് ദിവസം ഡാന്‍സ് ചെയ്ത രംഭയെ കാര്യമായി ശ്രദ്ധിച്ചില്ല.”
”എന്നാല്‍ നിഖിലയ്ക്ക് നോക്കുന്ന ഒറ്റ എക്‌സ്പ്രഷന്‍ വെച്ച് ആ പാട്ടിലൂടെ ശ്രദ്ധ കിട്ടി. റീലുകളില്‍ എല്ലാമുണ്ട്. അതില്‍ എനിക്ക് വളരെ സന്തോഷമുണ്ട്” എന്നാണ് ശശികുമാര്‍ പറയുന്നത്. ശശികുമാറിനൊപ്പം വെട്രിവേല്‍, കിടാരി എന്നീ സിനിമകളില്‍ നിഖില അഭിനയിച്ചിട്ടുണ്ട്. 2009ല്‍ ഭാഗ്യദേവത എന്ന ചിത്രത്തിലൂടെ അഭിനയരംഗത്തെത്തിയ നിഖിലയുടെ തമിഴ് അരങ്ങേറ്റ ചിത്രമാണ് വെട്രിവേല്‍.
മലയാളത്തില്‍ ലവ് 24×7 ആണ് നിഖില നായികയായി അരങ്ങേറ്റം കുറിച്ച ചിത്രം. മെട മീട അബ്ബായി എന്ന ചിത്രത്തിലൂടെ തെലുങ്കിലും നിഖില എത്തി. ഗായത്രി എന്ന ചിത്രത്തിലും നിഖില വേഷമിട്ടിട്ടുണ്ട്. അതേസമയം, ഗെറ്റ് സെറ്റ് ബേബി, ഒരു ജാതി ജാതകം എന്നീ സിനിമകളാണ് ഇനി നിഖിലയുടെതായി ഇനി റിലീസിന് ഒരുങ്ങുന്നത്.
