കേന്ദ്ര സര്‍ക്കാര്‍ ലോകസഭയില്‍ അവതരിപ്പിച്ച വഖഫ് ബില്‍ മുസ്ലീങ്ങളുടെ വ്യക്തി നിയമങ്ങളും സ്വത്തവകാശങ്ങളും കവര്‍ന്നെടുക്കാന്‍ ലക്ഷ്യമിട്ടുള്ള ആയുധമാണെന്ന് രാഹുല്‍ ഗാന്ധി.
ആര്‍എസ്എസും ബിജെപിയും അവരുടെ സഖ്യകക്ഷികളും ചേര്‍ന്ന് ഭരണഘടനക്കെതിരെ ആക്രമണം നടത്തുന്നുവെന്നും ഇത് മുസ്ലീമുകളെ ലക്ഷ്യം വച്ചുള്ളതാണെന്നും രാഹുല്‍ ഗാന്ധി പറഞ്ഞു.
ഭാവിയില്‍ മറ്റ് സമുദായങ്ങളെയും ഇങ്ങനെ ലക്ഷ്യം വച്ചേക്കാമെന്നും കോണ്‍ഗ്രസ് നിയമ നിര്‍മാണത്തെ ശക്തമായ എതിര്‍ക്കുന്നുവെന്ന് രാഹുല്‍ ഗാന്ധി പറഞ്ഞു.
ഇന്ത്യയുടെ ആശയത്തെ തന്നെ ആക്രമിക്കുകയും മതസ്വാതന്ത്ര്യത്തിനുള്ള അവകാശമായ ആര്‍ട്ടിക്കിള്‍ 25 ലംഘിക്കുകയും ചെയ്യുന്നതിനാല്‍ കോണ്‍ഗ്രസ് പാര്‍ട്ടി ഈ നിയമനിര്‍മാണത്തെ ശക്തമായി എതിര്‍ക്കുന്നുവെന്നും അദ്ദേഹം കൂട്ടിച്ചേര്‍ത്തു.
അതേസമയം, ക്രിസ്ത്യന്‍ സമൂഹത്തോട് ബിജെപി സര്‍ക്കാര്‍ അടുത്തകാലത്ത് വലിയ സ്‌നേഹമാണ് കാണിക്കുന്നതെന്ന് വഖഫ് ബില്‍ ചര്‍ച്ചയില്‍ കോണ്‍ഗ്രസ് എം.പി ഹൈബി ഈഡന്‍.
കേരളത്തില്‍ ക്രിസ്ത്യാനികളെയും മുസ്ലിംകളെയും വിഭജിക്കുക എന്നതാണ് ബിജെപി അജണ്ട.
മുനമ്പം ബി.ജെ.പിക്ക് രാഷ്ട്രീയ വിഷയമാണ്. നിലവിലെ ഭേദഗതി അനുസരിച്ച് ഭൂമിയുടെ ഉടമസ്ഥാവകാശം തിരിച്ചുകിട്ടുമോ എന്ന് വ്യക്തമല്ല. ഇതിനായി കാര്യമായ ഒരു നിര്‍ദേശവും ബില്ലിലില്ല. മുനമ്ബത്തോടുള്ള സ്‌നേഹമല്ല, കേരളത്തിലെ കൃസ്ത്യന്‍-മുസ്‌ലിം വിഭാഗങ്ങളെ ഭിന്നിപ്പിക്കാനുള്ള ശ്രമം മാത്രമാണ് ബിജെപി അജണ്ടയെന്നും ലോക്‌സഭയില്‍ വഖഫ് ഭേദഗതി ബില്‍ ചര്‍ച്ചക്കിടെ ഹൈബി പറഞ്ഞു.
മണിപ്പൂരില്‍ ക്രിസ്ത്യാനികള്‍ വേട്ടയാടപ്പെട്ടപ്പോള്‍ സിബിസിഐയും കെസിബിസിയും പറഞ്ഞത് കേള്‍ക്കാത്ത സര്‍ക്കാര്‍ ഈ വിഷയത്തില്‍ മാത്രം ഇത്രയധികം തല്‍പ്പരരാകുന്നത് എന്താണ്. ആംഗ്ലോ ഇന്ത്യന്‍ സംവരണം, ക്രൈസ്തവ സ്ഥാപനങ്ങള്‍ക്കെതിരായ കടന്നാക്രമണം, ചാരിറ്റി ഫണ്ട് തടയല്‍ അടക്കമുള്ള വിഷയങ്ങളില്‍ കെസിബിസിയും സിബിസിഐയും പ്രതികരിച്ചിരുന്നു. ആംഗ്ലോ ഇന്ത്യന്‍ സംവരണം തിരിച്ചുകൊണ്ടുവരാന്‍ ബിജെപിയെ താന്‍ വെല്ലുവിളിക്കുന്നു. കര്‍ണാടകയിലെ മതപരിവര്‍ത്തന നിയമം അടക്കം ക്രൈസ്തവരോട് വിവേചനപരമായി പെരുമാറുന്നതിന് ഉദാഹരണങ്ങള്‍ ഏറെയുണ്ട്.
Read more
കഴിഞ്ഞ ദിവസം പോലും ക്രൈസ്തവ പുരോഹിതരെ ഹിന്ദുത്വ തീവ്രവാദികള്‍ ആക്രമിച്ചു. മതപ്രചാരണത്തിന് ഭരണഘടന നല്‍കുന്ന അവകാശം ഉറപ്പാക്കുന്നതിന് ആര്‍എസ്എസിന്റെ കത്ത് ആവശ്യമുണ്ടോ എന്നും ഹൈബി ചോദിച്ചു.
